កងកម្លាំងចម្រុះខណ្ឌមានជ័យចុះប្រតិបត្តិការបង្ក្រាបល្បែងស៊ីសងក្នុងខណ្ឌមានជ័យនិងដកហូតវត្ថុតាងមួយចំនួន! ~ គេហទំព័រ រស្មីម្ជុលពេជ្រ រិទ្ធិជ័យ

{ខណ្ឌមានជ័យ}÷ កម្លាំងចម្រុះគណៈបញ្ជាការឯកភាពខណ្ឌមានជ័យ ចុះត្រួតពិនិត្យ និងអនុវត្តវិធានការរដ្ឋបាល ទីតាំងលួចបើកបង្កប់ល្បែងស៊ីសងខុសច្បាប់មួយកន្លែង ស្ថិតនៅចំណុចជិតចំណតរថយន្តជាន់ផ្ទាល់ដីអគារខុនដូរ R & F (ច្រកទី១) ក្នុងភូមិព្រែកតានូ សង្កាត់ចាក់អង្រែលេី ខណ្ឌមានជ័យ រាជធានីភ្នំពេញ កាលពីវេលាម៉ោង១៨:៣០នាទី ថ្ងៃទី២៤ ខែវិច្ឆិកា ឆ្នាំ២០២៤នេះ ។ ខណៈពេលចុះមកដល់ទីតាំង កម្លាំងបានត្រួតពិនិត្យឃើញទីតាំងខាងលេី មានបើកដំណើរការធម្មតា មានអ្នកទាំងភ្ញៀវចូលលេង និងនារីៗជាបុគ្គលិក សរុប៩នាក់ ក្នុងនោះមានបុរសជនជាតិចិន៤នាក់ បុរសជនជាតិខ្មែរម្នាក់, រួមទាំងបុគ្គលិក និងអ្នកអនាម័យនារី ៤នាក់ ។

ការចុះអនុវត្តវិធានការរដ្ឋបាលនេះ ធ្វេីឡេីងដោយមានការបញ្ជាដឹកនាំផ្ទាល់ពីលោក សេង គន្ធ អភិបាលខណ្ឌមានជ័យ ទេីបកម្លាំងចម្រុះគណៈបញ្ជាការឯកភាពខណ្ឌមានជ័យ មានកម្លាំងប្រជាការពារសាលាខណ្ឌមានជ័យ និងកម្លាំងអធិការដ្ឋាននគរបាលខណ្ឌមានជ័យ សហការជាមួយកម្លាំងសាលាសង្កាត់ចាក់អង្រែលេី និងកម្លាំងប៉ុស្តិ៍នគរបាលរដ្ឋបាលចាក់អង្រែលេី ដឹកនាំដោយលោក កែវ សំណាង អភិបាលរងខណ្ឌមានជ័យ និងសមាសភាពចូលរួម លោក ជុន ចាន់រាជស៍ មន្ត្រីរដ្ឋបាលខណ្ឌមានជ័យ, លោក សុក សាវន តំណាងចៅសង្កាត់ចាក់អង្រែលេី, លោកវរសេនីយទោ នូ ប្រីយសត្យា អធិការរងនគរបាលខណ្ឌមានជ័យ, លោកវរសេនីយ៍ត្រី ជា រតនា នាយប៉ុស្តិ៍នគរបាលចាក់អង្រែលេី ។

ចាប់យកវត្ថុតាងរួមមាន ៖ ទូហ្គេមបាញ់ត្រី ចំនួន០១គ្រឿង, តុបៀរ ចំនួន០៤, កុំព្យូទ័រ ចំនួន០៣, និងសម្ភារៈកៅអីមួយចំនួនទៀត ។ ចំពោះយកវត្ថុតាងខាងលើ ត្រូវបានចាប់យកមករក្សាទុកនៅសាលាខណ្ឌមានជ័យ ហេីយចំពោះទីតាំងខាងលេីវិញ ត្រូវបានអាជ្ញាធរ បិទទ្វារចាក់សោរជាបណ្តោះអាសន្ន ។

បច្ចុប្បន្នមនុស្សទាំងអស់ មានទាំងបុគ្គលិក និងអ្នកចូលលេង(ភ្ញៀវ) ត្រូវបានឃាត់ខ្លួន បញ្ជូនទៅស្នាក់ការប៉ុស្តិ៍នគរបាលចាក់អង្រែលេី ដេីម្បីរងចាំចំណាត់ការបន្ត ៕